Ottaadhu

’வில்லுப்பாட்டுக்காரன்’ என்ற படத்தில் வாலி எழுதி இளையராஜா இசையில் மலேசியா வாசுதேவன் பாடிய ‘தந்தேன் தந்தேன் இசைச் செந்தேன் செந்தேன்’ என்ற பாடல் கேட்டிருப்பீர்கள்.

எந்தச் சொல்லிலும் பாடுகிறவருடைய உதடுகள் ஒட்டாத பாட்டு அது. இந்த அறிமுகத்தோடு அதைக் கேட்டால் பிரமிப்பாக இருக்கும், அறிமுகமின்றிக் கேட்டாலும் இனிமையாகவே இருக்கும்.

உதடு ஒட்டாமல் எழுதுவது அப்படியொன்றும் சிரமமில்லை. ரெண்டே எழுத்துகள்தான்: ப, ம, இந்த இரு குடும்பங்களைச் சேர்ந்த 26 எழுத்துகளையும் கவனமாகத் தவிர்த்துவிட்டால் போதும்.

இதில் இன்னொரு ட்ரிக்கும் உண்டு. ’ம்’மில் முடியும் சொற்களுக்குப் பக்கத்தில் க, ச அல்லது த குடும்ப எழுத்துகளில் தொடங்கும் சொற்களைக் கொண்டுவந்தால், ம் காணாமல்போய்விடும். உதாரணமாக, ‘நிறம் கண்டேன்’ என்றால் உதடு ஒட்டும், ‘நிறங்கண்டேன்’ என்று எழுதினால் ஒட்டாது. இதேபோல் ‘நிதஞ்சொன்னேன்’, ‘வளந்தந்தாய்’ என்று சமாளிக்கலாம்.

சும்மா சாம்பிளுக்கு, உதடுகள் ஒட்டும் முத்தத்தைப்பற்றி உதடு ஒட்டாத வெண்பா ஒன்று எழுதிப்பார்த்தேன்.

இதழ்நான்(கு) இணைந்தே எழுது கவிதை,
இதஞ்சேர்த்து நெஞ்சில் இயைய, வதனந்தான்
செக்கர்வான் ஒத்துச் சிவந்து சிலிர்த்திடவே,
அக்கணத்தில் ஆசையொ(டு) ஆழ்

இந்த வெண்பாவில் ‘வ’ என்ற எழுத்து வரும்போதெல்லாம் உதடு பல்லில் படும், உ, ஊ, ஒ, ஓ குடும்ப எழுத்துகள் வரும்போதெல்லாம் உதடுகள் ஒட்டுவதுபோல் குவியும், ஆகவே, அந்த எழுத்துகளும் இல்லாமல் எழுதவேண்டும் என்பார்கள் சிலர். அது ரொம்பக் கஷ்டம்.

இதெல்லாம் சும்மா கிம்மிக்ஸ். கவிதை என்பது அதைத்தாண்டி நிற்கவேண்டுமில்லையா?

அதற்கு உதாரணமாக, உதடு ஒட்டாத இந்தத் திருக்குறள்:

யாதனின் யாதனின் நீங்கியான் நோதல்
அதனின் அதனின் இலன்

ஒரு பொருள்மீது ஆசையை நீக்கிவிட்டால் போதும், அந்தப் பொருளால் நம் மனத்துக்கு நோவு வராது!

Advertisements

One thought on “Ottaadhu

  1. உதடு ஒட்டாத ‘யாதனின்’ குறள் கேட்கும்போதெல்லாம்,
    ஒவ்வொரு வார்த்தையிலும் உதடு ஒட்டும் இந்தக் குறளும் ஞாபகத்திற்கு வரும்.

    பற்றுக பற்றற்றான் பற்றினை அப்பற்றைப்
    பற்றுக பற்று விடற்கு.

    Thiruvalluvar the great!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s