Arasan

அரசன் தன்னுடைய மக்களை எந்தத் துன்பங்களிலிருந்து காக்கவேண்டும்? பெரியபுராணத்தில் மனுநீதிச்சோழன் இதைச் சொல்வதாக எழுதுகிறார் சேக்கிழார்:

1. தன்னால் வரும் துன்பங்கள்
2. தன்னுடைய பரிவாரங்களால் வரும் துன்பங்கள்
3. பகைவரால் வரும் துன்பங்கள்
4. கள்வரால் வரும் துன்பங்கள்
5. பிற உயிர்களால் வரும் துன்பங்கள்

வரிசையைக் கவனியுங்கள்: ஓர் அரசன், மக்களுக்குத் தன்னாலும் தன்னோடு இருக்கும் நண்பர்கள், உறவினர்கள், அமைச்சர்கள், அதிகாரிகளாலும் ஏற்படக்கூடிய துன்பங்களிலிருந்து மக்களைக் காக்கவேண்டும். அதை முதலில் சொல்லிவிட்டு, அதன்பிறகுதான் பகைவர், கள்வர், காட்டு மிருகங்கள் செய்யும் துன்பங்களைச் சொல்கிறார்!

‘மாநிலம் காவலன் ஆவான்
மன்னுயிர் காக்கும்காலை,
தான் அதனுக்கு இடையூறு
தன்னால், தன் பரிசனத்தால்,
ஊனம் மிகு பகைத்திறத்தால்,
கள்வராய், உயிர்கள்தம்மால்
ஆன பயம் ஐந்தும் தீர்த்து
அறம் காப்பான் அல்லனோ!’

Advertisements

PunmuRuval

சிரிப்புக்கும் புன்முறுவலுக்கும் என்ன வித்தியாசம்?

புன்(ல்) + முறுவல் = புன்முறுவல்

இங்கே ‘புன்’/’புல்’ என்ற சொல் ‘புன்மை’, அதாவது, சிறுமையை, குறைவான அளவைக் குறிக்கிறது. புன்முறுவல் என்றால், சிறு முறுவல்.

‘புன்னகை’ என்பது புன்(ல்) + நகை என்று பிரியும். ஆகவே, ‘இந்தப் புன்னகை என்ன விலை’ என்று காதலியையும் கேட்கலாம், பிளாட்ஃபாரத்தில் பாய் விரித்துச் சிறு நகைகளை விற்கும் கடைக்காரர்களையும் கேட்கலாம்.

‘முள் நுனை தோன்றாமை முறுவல்’ என்கிறது கலித்தொகை. முள் போன்ற பற்களின் நுனி தெரியாதபடி சிரிப்பதுதான் முறுவலாம்.

ஆக, புன்முறுவல் என்பது பற்கள் சற்றே வெளித்தெரிகிற, அல்லது பற்களே தெரியாதபடி உதட்டாலே சிரிக்கிற குறுஞ்சிரிப்பு எனலாம்.

Perukku

’பெருக்கு’ என்ற சொல், ‘பெருகு’/’பெருகுதல்’ என்ற சொல்லிலிருந்து வருகிறது. ’பெருகுதல்’ என்றால் அதிகரித்தல், ஆற்றில் வெள்ளம் பெருகியது, வீட்டில் செல்வம் பெருகுகிறது, நாட்டில் பயிர்கள் பெருகும்.

‘பெருகுதல்’ என்பது தன்வினை (தானே செய்தல்), ‘பெருக்குதல்’ என்பது பிறவினை (பிறர் செய்தல்). ‘அவனிடம் செல்வம் பெருகியது’, ‘அவன் செல்வத்தைப் பெருக்கினான்’ ஆகிய சொற்றொடர்களை ஒப்பிட்டுப்பார்த்தால் புரியும்.

‘பெருக்கு’ என்ற கட்டளையை நாம் கணக்குப்பாடத்தில்தான் அதிகம் பார்த்திருப்போம்: எட்டை ஒன்பதால் பெருக்கு என்றால், எட்டை ஒன்பது மடங்காக ஆக்கு, அதனை ஒரு மிகப் பெரிய எண்ணாக அதிகரிக்கச்செய் என்று பொருள்.

’குப்பையைப் பெருக்கு’ என்றால், குப்பையை அதிகமாக்கு என்று பொருளில்லை. வீட்டில் வெவ்வேறு இடங்களில் இருக்கிற குப்பையை ஒரே இடத்தில் பெருக்கி வெளியேற்று என்ற பொருளில் அந்தக் கட்டளை அமைந்திருக்கலாம்.

‘ஆடிப்பெருக்கு’ என்பதில் வரும் ‘பெருக்கு’ கட்டளைச்சொல் அன்று. அதுவொரு பெயர்ச்சொல்.

சில நேரங்களில், வினைச் சொற்கள்/ கட்டளைச் சொற்கள் அப்படியே பெயர்ச்சொற்களாக ஆவதுண்டு. எடுத்துக்காட்டாக:

* வளை => கட்டளைச்சொல் (இந்தக் கம்பியை வளை, வளைக்கப்பட்ட நகைக்கும் அதுவே பெயர் (அழகிய வளை அணிந்தாள்)
* கிளை => கட்டளைச்சொல் (கிளைத்துச்செல்), அப்படிக் கிளைத்துச்சென்ற பொருளுக்கும் அதுவே பெயர் (மரக்கிளை)
* நறுக்கு => கட்டளைச்சொல் (நறுக்கிச் சிறிதாக்கு), அப்படி நறுக்கப்பட்ட துண்டுக்கும் அதுவே பெயர் (காகித நறுக்கு)
* சுழல், சுழி => கட்டளைச்சொல் (சுழன்று செல்), அப்படிச் சுழன்று செல்லும் அமைப்புக்கும் அதுவே பெயர் (நீர்ச்சுழல், நீர்ச்சுழி)

இதுபோலவே, ‘பெருக்கு’ என்ற கட்டளைச்சொல் பெருக்கப்படுவதற்கும் பொருந்துகிறது. ‘நீர்ப்பெருக்கு’ என்றால், (மழையாலே) பெருக்கப்பட்ட நீர்/வெள்ளம். ‘ஆடிப்பெருக்கு’ என்றால், ஆடி மாதத்திலே பெருக்கப்பட்ட நீர்/வெள்ளம். இதைப் ‘பெருக்கம்’ என்றும் அழைக்கலாம் (பெருக்கு + அம்).

’பெறுகு’ (பெருகுதல்) என்பதன் எதிர்ச்சொல் ‘அருகு’ (அருகுதல்). ஆகவே, ‘பெருக்கம்’ என்பதன் எதிர்ச்சொல் ‘அருக்கம்’.

திருநாவுக்கரசர் தேவாரப்பாடலொன்றில் சிவனை ’அருக்கமாய், பெருக்கம் ஆகி’ என்று பாடுகிறார். இதன் பொருள், நுட்பத்திலும் நுட்பம் (மிக அருகியவன்) சிவனே, பெரிதிலும் பெரிதும் (மிகப் பெருகியவன்) சிவனே.

ஆடிப்பெருக்கில் அந்த ஆத்திசூடி அருளால் அனைத்துத் துயரங்களும் அருகட்டும்!

NiRutham

‘வேலை நிறுத்தம்’ என்ற சொல்லே எனக்குப் பிடிக்காது என்று அறிவித்திருக்கிறார் ரஜினிகாந்த்.

அழகான சொல்தானே? ரஜினிக்கு ஏன் பிடிக்கவில்லையாம்?

’நிறுத்து’ என்ற கட்டளைச்சொல்லிலிருந்து ‘நிறுத்தம்’ என்ற சொல் வருகிறது. ’சுருக்கு’ என்பதிலிருந்து சுருக்கம், ‘அழுத்து’ என்பதிலிருந்து ‘அழுத்தம்’, ‘திருப்பு’ என்பதிலிருந்து ‘திருப்பம்’ வருவதுபோல.

’நிறுத்தம்’ என்ற சொல்லின் பொருள், நிறுத்துதல், நிறுத்திவைத்தல்; ’வேலை நிறுத்தம்’ என்றால், (ஏதோ ஒரு கோரிக்கையை முன்வைத்து) வேலையை நிறுத்துதல். இதேபோல் ‘மின்சார நிறுத்தம்’ என்பார்கள், ‘குடிநீர் நிறுத்தம்’ என்பார்கள். Pause என்ற சொல்லைத் தமிழில் ‘இடைநிறுத்தம்’ என்று மொழிபெயர்ப்பதுண்டு.

இதே சொல், ‘நிறுத்தும் இடம்’ என்கிற பொருளிலும் வரும். எகா: பேருந்து நிறுத்தம்.